87Al-A'laa

بِسْمِ اللَّهِ الرَّحْمَٰنِ الرَّحِيمِ سَبِّحِ اسْمَ رَبِّكَ الْأَعْلَى

(اي پيغمبر) اُنھي پنھنجي تمام مٿاھين پالڻھار جي نالي جي پاڪائي بيان ڪر.

الَّذِي خَلَقَ فَسَوَّىٰ

جنھن (ساري مخلوق کي) خلقيو پوءِ سنئين لڱين ڪيائين.

وَالَّذِي قَدَّرَ فَهَدَىٰ

۽ جنھن اندازو ڪيو پوءِ رستو ڏيکاريائين.

وَالَّذِي أَخْرَجَ الْمَرْعَىٰ

۽ جنھن تازو گاھ ڄمايو.

فَجَعَلَهُ غُثَاءً أَحْوَىٰ

پوءِ اُن کي سُڪو سڙيو ڪيائين.

سَنُقْرِئُكَ فَلَا تَنْسَىٰ

اسين توکي (قرآن) پاڙھينداسون پوءِ نه وساريندين.

إِلَّا مَا شَاءَ اللَّهُ ۚ إِنَّهُ يَعْلَمُ الْجَهْرَ وَمَا يَخْفَىٰ

مگر جيڪي الله گھريو آھي، بيشڪ اُھو ظاھر کي ڄاڻندو آھي ۽ جيڪي ڳُجھو آھي تنھن کي (به).

وَنُيَسِّرُكَ لِلْيُسْرَىٰ

۽ آسان رستو توکي سنھنجو ڪري ڏينداسين.

فَذَكِّرْ إِنْ نَفَعَتِ الذِّكْرَىٰ

پوءِ جيڪڏھن نصيحت ڏئڻ فائدو ڪري ته نصيحت ڪر.

سَيَذَّكَّرُ مَنْ يَخْشَىٰ

جيڪو ڊڄندو سو سُتت سمجھ وٺندو.

وَيَتَجَنَّبُهَا الْأَشْقَى

۽ اُن (نصيحت وٺڻ) کان (اُھو) تمام نڀاڳو پاسو ڪندو.

الَّذِي يَصْلَى النَّارَ الْكُبْرَىٰ

جو وڏيءَ باھ ۾ پوندو.

ثُمَّ لَا يَمُوتُ فِيهَا وَلَا يَحْيَىٰ

وري نڪي اُتي مرندو ۽ نڪي جيئرو رھندو.

قَدْ أَفْلَحَ مَنْ تَزَكَّىٰ

بيشڪ اُھو ڇٽو جيڪو سڌريو.

وَذَكَرَ اسْمَ رَبِّهِ فَصَلَّىٰ

۽ پڻ پنھنجي پالڻھار جو نالو ياد ڪري نماز پڙھندو رھيو.

بَلْ تُؤْثِرُونَ الْحَيَاةَ الدُّنْيَا

بلڪ دُنيا جي حياتيءَ کي (آخرت کان) پسند ڪندا آھيو.

وَالْآخِرَةُ خَيْرٌ وَأَبْقَىٰ

۽ (حقيقت ڪري) آخرت ڀَلي آھي ۽ ھميشه رھڻ واري آھي.

إِنَّ هَٰذَا لَفِي الصُّحُفِ الْأُولَىٰ

بيشڪ ھيءَ (بيان) پھرين صحيفن ۾ (به لکيل) آھي.

صُحُفِ إِبْرَاهِيمَ وَمُوسَىٰ

جي صحيفا ابراھيم ۽ مُوسىٰ جا آھن.